Sosue 18

Israɛ -nyʋ -wee' 'kɩɩn ɛ "jru i 'de Silo -wɛe ʋʋ po -tan 'tan -ɛ -sɔn nyʋ ke Nyɔsoa a -gbʋan' a "i "jɛi, dɛ-nʋɛ' mɛ -nɩ 'blʋa -wee' jaa "jru ja 'de ʋʋpʋ "juɛi. 2 'Kaa 'de Israɛ -nyʋ "kwlu ɛ 'blʋa 'a 'blowɔn -mɛ" 'sɔɔn -sie' -ɩ -se' ɩa' -nɩ 'kɛn 'je. 3 'Sʋ Sosue' 'a -wlu 'de Israɛ -nyʋ -pee ka -ɩn -na: Nɔ" -tiiɛ' aoa' dɩ 'je cɛn 'de Nyɔsoa 'blʋa, aoa' "bɛman -wi" 'a Kea "nyɩa aopʋ -ɛ -jea aoa' dɛ 'kpa 'a -tɩ' 'ʋn -ɛ? 4 'De 'blʋa 'a 'blowɔn "dii ao -sa 'e nyʋ tan tan 'ɩn 'je ʋʋpʋ dbo: Ʋʋ a muɛ 'blʋa -nɛ 'jɛa -wɛe ka ʋʋa' 'kɛn 'jea i -tee -sʋn nʋ do do ʋʋ 'jeɛ -gboo "i po, -bo ʋʋ -kɔ' -mɛ "i ɛ 'de ʋʋ 'je de ji ʋʋ 'je 'ʋn "kuan po 5 'Sʋ ʋʋ a muɛ 'ʋn -seea' kpɛ -mɛ" 'sɔɔn. Suida 'a 'blʋa 'a 'blowɔn ɔ muɛ 'de Nekɛfʋ sia' -wɛe Sosɛu 'a -gbu" -sɔn nyʋ 'je 'de 'kwea sie. 6 Ka ɛɛ' 'fɔ -mɛ" 'sɔɔn nɩa ao 'crɩ ɛ 'ka. Aoa muɛ jia' ao 'jeɛ mii" to- -wɛe 'ɩn 'je ɩa' soa' po -ta 'de Nyɔsoa -aa Kea "juɛi. 7 'Ka Lefi 'a "nynuu -mʋ se 'kɛn deejrɛ' 'jei 'de ao "kwlu, dɛ-nʋɛ' Nyɔsoa 'a 'sraa -saʋn 'a dbo mɛ -nɩ ʋʋa' -nɩ dɛ nɩ. 'Kaa Gadɩ ke Rubɛnɩ 'a 'blʋa 'a 'blowɔn ke Manase 'a 'blʋa 'a 'blowɔn 'ɔ tɔo -mʋ 'je ʋʋpʋ 'a -nɩ 'mɛ 'de Sudɛn 'ɛ 'jrʋ 'a 'wlʋʋ 'ɩn fɔo, ka Moisɩ Nyɔsoa 'a dbo nʋɩ "nyɩ ʋʋpʋ ɛ. 8 Nyʋ ʋʋ -sae' -ʋʋ -jea 'blʋa -nɛ 'ɛ nɩ sʋn 'a dɩ 'crɩ 'kpa -jei". Ʋʋ 'jea -jei" 'kpa 'sʋ Sosue' -tuɛ" ʋʋpʋ 'srɩn ka. Ao mʋ 'blʋa -nɛ "jrɛɛ, ao 'crɩ dɩ -nɩɛ 'di -wɛe ao 'je de ji 'de wo -ta 'de Silo. 'Ma muɛ soa' poa' 'de Nyɔsoa "juɛi 'de -ta.

9 Nyʋ -nʋ muɛ 'blʋa -nɛ "jrɛɛ 'a -cɛɛn'-, -wɛe ka ɩa' "kwi -kwlɔ nɩa, ʋʋ 'crɩ ɩa' sbɛ do do, 'de ʋʋ -see' ɛ 'ʋn kpɛ -mɛ" 'sɔɔn. -Wɛe ʋʋ ji de ʋʋ jɛɛ Sosue' 'de -ta ʋʋa -kwlea' 'de Silo. 10 'De Nyɔsoa "juɛi 'e Silo ɛ, Sosue' poɛ soa' -wɛe ɔ -seea' 'blʋa 'ʋn 'de Israɛ -nyʋ 'nynɩ, 'sʋ ɔ "nyɩɛ 'blʋa 'a 'blowɔn -nɩ do do.

11 -Gbɛin" 'a wɔn -wlʋa 'de Bɛnsamɛ 'ɛ 'blʋa 'a 'blowɔn 'di ɛ, ɩmɩ -je 'blʋa 'a 'fɔ ɔ poa soa' -wɛe ɔ -sea' 'ʋn 'a "i -saa -nɩ. Ʋʋa' 'blʋa nɩɛ 'de Suida 'a "nynuu ke Sosɛu 'a "nynuʋ nmai nynuu 'a -nɩ 'nynɩ. 12 Ʋʋa' -paʋn -nɩa 'de 'kwea fɔo tba 'de Sudɛn -pʋn", ɛ 'ja 'de Seriko -gbɩn 'de 'kwea fɔo, -wɛe ɛ jii crʋ 'di 'de 'jrʋ 'a blʋ 'ɩn fɔo, 'de ɛ nyni 'de Bɛtɩ Afɛnɩ 'a -pɩɩɔn" blʋa 'di. 13 Dɛ -tba' 'mʋa-, ɛ mu' ɛ je Lusɩ nyʋ a 'daa Betɛlɩ jɛɛ, 'de ɛ -pɩn' ɛ wɔi 'de Nekɛfʋ fɔo, -wɛe ɛ cɛɛn crʋ -nɩa 'de Bɛtɩ Orɔn 'de sɔin "kpei 'de ɛ nyni Atarɔtɩ Adaa. 14 'Sʋ ɛ, dɛ -tba' 'de crʋ "kpei ɛ, ɛ "ka 'ʋn 'ɛ 'de 'jrʋ 'a blʋ 'ɩn -wɛe ɛ "bie i 'de Nekɛfʋ -wɛe ɛ nyni Kiliatɩ Baalɩ -ɛɛ 'nynɩ 'kpa Kiliatɩ Ɩarimʋ 'bode ɛ, ɛ nɩɛ Suida 'a 'blʋa 'a 'blowɔn 'ɔ "kwi -kwlɔ. -Ta ɛɛ' -paʋn cɛan 'de 'jrʋ 'a blʋ 'ɩn fɔo 'de -nao.

15 Ɛɛ' -paʋn -nɩa 'de Nekɛfʋ -teɛ 'de Kiliatɩ Ɩarimʋ, ɛ muɛ 'de 'jrʋ 'a blʋ 'ɩn 'de "kao -nɩa 'de Nefʋtoa, 16 dɛ -wlʋa 'mʋa- a, ɛ "siɛ i 'de crʋ -nɩa 'de Bɛnɩ Inɔmʋ 'a -toʋn" "jru 'a bʋ o, 'de Refaimʋ -nyʋ 'a -toʋn" 'a 'kwea. Ɛ -cre 'de Inɔmʋ 'a -toʋn" 'di, 'de ɛ Sebusɩ -nyʋ 'a crʋ -nɩa 'de Nekɛfʋ -gbɩn -wɛe ɛ nyni Einɩ Rokɛlɩ. 17 'Sʋ ɛ "bi ɛ i 'de 'kwea -wɛe ɛ nyni 'de Einɩ Semɛsɩ, 'de ɛ nyni Kelilɔtɩ 'de Adumimʋ 'a 'ja na'. Dɛ -tba' 'mʋa-, ɛ "si ɛ i 'de "sou nyʋ a 'daa Bɔan o fɔo, 'nynɩ -nɩa 'mʋa- nɩɛ Rubɛnɩ 'a "ju due' 'a 'nynɩ -o. 18 Ɛ cɛɛn 'de crʋ -nɩa 'de Alaba 'a -toʋn" 'jru wɔ -wɛe ɛ muu 'de ɛɛ' -toʋn" tu 'di. 19 Ɛ mu' ɛ jiɛ 'de Bɛtɩ Okla 'a -gbɩn "kpei 'de 'kwea -wɛe ɛ nyni 'tɔniɛ 'tɔn -siia "i 'a "jɛi 'a "jɛi -ta Sudɛn 'kpaa ɛ wɔn ɛ. -Ta ʋʋa' -paʋn -nɩa 'de Nekɛfʋ fɔo cɛan 'de -nao. 20 Sudɛn -gbuu mɛ nɩ ɛɛ' -paʋn 'de 'jrʋ 'a 'wlʋʋ 'ɩn fɔo. Ka Bɛnsamɛ 'ɛ -gbɛin" 'di nyʋ 'a 'blʋa 'a 'blowɔn -paʋn cɛan 'ka -nao.

21 -Gbɛin" 'a wɔn -wlʋa 'de Bɛnsamɛ 'ɛ 'blʋa 'a 'blowɔn 'di ɩa' "kwi -kwlɔ ɩ 'jea ɩ ka: Seriko, Bɛtɩ Okla, Emɛkɩ Kesitɩ, 22 Bɛtɩ Alaba, Semaraimʋ, Betɛlɩ, 23 Afimʋ, Pala, Ofla, 24 Kefaa Amonai, Ofʋni ke Keba ke, ɩ bea o ɩ nɩɛ "kwi -kwlɔ ke -kwlɔ 'ɔ -puue 'jɔ 'sɔɔn, 25 Gabaɔn, Rama, Beerɔtɩ, 26 Mitɩsɩpe, Kefira, Motɩsa, 27 Rekɛmʋ, Jipeɛlɩ, Taleala, 28 Sela, Elɛfʋ, Sebusɩ ɛ mɛ -nɩ Selisalɛmʋ, Kibeatɩ, Kiliatɩ: Ɩ bea o ɩ nɩɛ "kwi -kwlɔ 'ɔ -puue 'jɔ -nyiiɛ' ɩ ke -kwlɔ ɩ 'blea ke. Bɛnsamɛ 'ɛ -gbɛin" 'a -nɩ 'kɛn -nao.